鄭藝超
作為一個澳洲出生嘅華人，我經常被問點解會選擇喺香港生活同讀書，甚至有啲人問我咩係人類學。其實，我當初自己都唔清楚呢個學科喺讀咩。在呢篇反思文中，我會分享點解選擇香港同人類學，並探討我嘅學術旅程。
可能有啲師兄師姐唔太習慣我呢種寫作風格，但我希望大家能理解，喺我嘅學習過程中，我發現書面語未必能夠真實表達「我手寫我心」嘅感覺，所以我選擇用廣東話，而唔係書面中文。呢篇文章對我有深刻嘅個人意義，反映我喺唔同文化之間生活嘅挑戰。語言同文化差異經常引起誤解，我希望透過呢篇文，讓大家更了解我嘅經歷。
你可能以為，作為澳洲出生嘅我會比較容易融入澳洲本地嘅生活，但其實並唔係咁。無論係學校定屋企，我一直覺得自己似係喺監獄入面，冇人理解我。住喺昆士蘭遠北地區嘅小鎮 Cairns，班上冇其他華人，自己感到孤單，也唔覺得自己係澳洲人。我從細就唔鍾意返學，經常被人蝦，甚至要匿喺廁所食午餐。當時唔識講英文，唔知道點樣表達自己，返屋企又唔夠廣東話解釋，媽咪誤會我成日打交，唔知道其實並唔係咁。
有一日喺布里斯班讀大學嘅時候，我同建築系嘅同學研究當地原住民嘅建築。喺呢個過程中，我見到土著小朋友喺大家庭中成長，圍住親戚朋友學識攀石同釣魚。嗰陣，我開始諗，如果可以喺祖先嘅土地上生活會係點? 最終，我決定離開澳洲，追尋呢個想法。
但當時，我唔敢同父母講，因為佢哋已經為我入讀大學感到驕傲。喺家庭中，我一直係個 「聽話」嘅孩子，冇足夠嘅技能應對建築學嘅挑戰。讀建築時，每次老師批評我嘅建築圖設計，我都唔識反駁，唔知道應該點講，最後選擇放棄，唔再留喺澳洲。
返香港讀書對我嚟講，好似浸咗下咸水或者珠江咁。其他人選擇出國讀書，但對我嚟講，返香港就係我嘅「海外留學」。不過，我媽唔希望我返，因為我未完成澳洲學業、又冇錢，佢擔心我返香港，佢會冇面。當時，我完全唔明白父母嘅世界觀，亦冇辦法同佢哋解釋我喺澳洲嘅困難。
返到香港，我發現冇我想像中嘅溫暖。第一份工係同親戚做，但感覺被利用。由於我嘅廣東話唔夠好，無法好好表達自己、感覺冇人理解我，心情十分沮喪，最終辭咗工。儘管朋友話，如果繼續做會成功，但我知道呢度唔係我想留嘅地方。後來，我開始返香港科技大學旁聽人類學課程，並去廣州市南沙區做田野調查，結識咗一班來自中國大陸嘅同學，開始對本土歷史同人類學產生興趣。
當我媽同佢啲澳洲朋友講我讀人類學（Anthropology）時，佢哋唔明點解我會返到香港研究螞蟻，誤會咗 Anthropology 頭三個字母「ANT」係指「螞蟻」。而爸爸一直唔支持我，認為我所學嘅科目唔會幫助我搵到好工作，甚至覺得會令佢尷尬。有人問起我嘅時候，佢甚至話唔知道我係喺香港做咩。
我喺2009年喺廣州讀咗半年中文，之後同年八月返到香港繼續攻讀人類學研究碩士學位。終於可以喺香港讀書，對我嚟講真係一個夢想成真嘅時刻！但係，我好快發現課程對我嚟講充滿挑戰。轉咗學科之後，我一直覺得閱讀同寫作真係好難。
香港嘅大學生活同我想像中嘅精彩同有趣相差好遠，反而成日覺得自己似係困喺壓力煲入面。當時，我希望識多啲香港朋友，甚至有女朋友，但我嘅朋友圈大多係啲新來嘅大陸學生。雖然返到香港其中一個目標係提高廣東話，冇諗過反而係普通話進步得比廣東話更快。
每日都覺得自己喺同時間賽跑，無論點樣努力，總覺得唔夠。社交圈愈來愈細，最終只剩下我同一堆睇唔晒嘅書。就好似迷失喺文字嘅迷宮入面，加埋啲新概念又唔容易理解，我時常問自己：「我究竟係唔係又走錯咗一條路？」
奇怪嘅係，研究工作成為咗我嘅避風港。喺研究中，我似乎可以找到一種失落中嘅平靜，專心做研究變得越來越重要。可能最重要嘅體會，就係喺香港中文大學做人類學研究期間，我開始明白孤獨感對我來講係好重要嘅。孤獨令我可以集中火力，更好咁專心思考，唔受外界干擾，全心全意投入研究。其實研究唔係一蹴而就嘅過程，佢需要日積月累嘅時間去設計、收集資料、整理資料同寫作。無論係一篇論文定係一個口頭報告，最終呈現出來嘅成果，只係過程中嘅冰山一角，背後嘅努力、思考同反覆修正，先係研究嘅核心所在。
啱啱返到香港中文大學嘅頭幾日，校園太大，成日唔知自己喺邊度。我仲記得，同啲大陸同學開玩笑話，第一樣要買嘅就係爬山鞋，因為中大校園好多斜路，唔似中國大陸嘅平坦校園，學生仲經常騎單車。有一次等校巴時，一個廣州同學話我嘅廣東話聽落似80年代嘅講法，先至發現自己嘅廣東話，已經停咗喺媽媽以前喺香港嘅年代。
香港同中國大陸嘅大學生活真係唔同，我嘅日常作息亦變得亂咗。不過，啲小細節幫我更加清楚咁理解唔同文化之間嘅差異。例如，喺中國，食堂有固定時間，而香港就冇。喺香港我嘅日程經常打亂，甚至食啲下午茶餐，例如炸雞同檸檬批，當作早餐都係常有嘅事。我可以從呢個經歷中明白到香港嘅便利，但同時都體會到佢嘅後果，尤其係喺健康方面缺乏監管。
大學時無論喺澳洲定香港，我面臨咗唔少挑戰，但最終我選擇繼續努力深造，並且得到教授嘅鼓勵。離開澳洲之後，九年過咗，我喺香港唔同嘅大學進行研究，增強咗學術寫作同思考能力。
儘管如此，我最終選擇留喺香港，因為我鍾意香港校園嘅豐富資源同學術氛圍。我本來唔打算返澳洲，但有個唔可以錯過嘅機會出現。2017年，我獲邀申請一個有關華人澳洲移民歷史同文化遺產嘅「中澳承傳長廊」項目，並成功獲得博士研究位置，專注研究澳洲中山僑民資助嘅學校。喺研究過程中，我發現呢啲學校，即使喺珠三角地區，仍然係澳洲歷史文化遺產嘅一部分。我嘅研究跨越三種語言、兩個國家，涵蓋人類學、建築學、歷史和遺產等多個學術領域，最終順利完成博士學位，並獲得學術界的認可，榮獲最佳博士論文獎。一位評審曾話，佢覺得呢篇作品好震撼，係佢睇過最好嘅澳洲歷史論文。讀過我論文嘅澳洲出生華人都話，呢篇論文好難放低，幫佢哋填補咗好多知識空白。
回望過去，我走咗一條另類嘅路，呢條路帶來咗唔少改變。喺呢段經歷中，我明白咗，人類學唔單止係理論，更加係一種實踐嘅工具，幫助我搭建澳洲、香港同中國文化之間嘅橋樑，並讓我重新理解自己嘅身份，喺多元文化嘅社會中找到屬於自己嘅位置。
其實，好多香港華人，包括我嘅父母，都覺得人類學係冷門學科，唔見得有咩出路。但佢哋可能未必知道，正因為人少、競爭少，反而為研究提供咗更多嘅機會，就好似穩坐釣魚船咁，能夠輕鬆掌握有利嘅時機。而且做研究唔係一味跟隨人群，而係要去啲未曾踏足過嘅地方，睇啲未曾見過嘅事物。呢啲，都需要膽量，正如「不入虎穴，焉得虎子」。如果唔跳出舒適圈，點樣探索新嘅世界？如果唔深入理解呢個世界，點樣做到「入得其門，見得其人」，令世界同人際關係變得更加和諧？
透過人類學，我唔單止學識理解「他人」，更重要係學識理解「自己人」。呢段過程唔單止令我成為更好嘅學者，仲令我成為更好嘅人。正如一位導師所講，人類學唔係單純傳授知識，仲係教你「點做人」。呢句話深深啟發咗我，唔單止改變咗我對社會嘅睇法，仲令我重新思考人性，探索點樣成為更好嘅自己。
鄭藝超 (Christopher Cheng) 校友於2012年在中大取得人類學哲學碩士學位，他的太太高朗賢 (Kiko Ko) 則畢業於中大2011年人類學.